அழகிய மார்கழியே அழிந்து விட்டாயே
அட்டகாசம் செய்யும் மனிதர் இனத்தால்
அம்சமாய் இருக்கும் அம்மாவின் வண்ணக்
கோலங்கள் வாசலில் இல்லை நல்ல எண்ணக்
கோலங்கள் யார் மனதிலும் இல்லை
பனிபொழியும் இனிய அந்த மார்கழிக்
காலையில் இருக்கும் அழகு இன்று இல்லை
ஈரம் சொட்டும் கூந்தலுடன் கோவிலுக்குச்
செல்லும் பெண்களும் இன்று இல்லை
தூரத்தில் கேட்கும் சுப்ரபாதமும் அருகில்
உள்ளவரின் குறட்டையால் கேட்கவே இல்லை
ஆசையுடன் அம்மா கொண்டுவரும்
பொங்கலும் சுண்டலும் இல்லவே இல்லை
அதை அதிகாரத்துடன் சண்டையிட்டு
பங்குபோடும் அண்ணனும் இங்கு இல்லை
இவையெல்லாம் வெளிநாட்டில் இருக்கும்
எனக்கும் மட்டுமில்லை உள்ளூரில் உள்ள
உங்களுக்கும் கிடைப்பது இல்லை
கால மாற்றத்தால்
மாறிய மார்கழி மாதம்!
- அன்புடன்
மாலா குருபிரசாத்
